3 красавіка 2025 года ў Брэсцкім дзяржаўным тэхнічным універсітэце ўрачыста адкрылі фотапраект «Работнікі БрДТУ — ветэраны Айчыннай вайны», прысвечаны гераічнаму подзвігу супрацоўнікаў універсітэта, якія ўдзельнічалі ў Вялікай Айчыннай вайне. Мерапрыемства стала важнай падзеяй у жыцці ўніверсітэта ў год 80-годдзя Перамогі савецкага народа ў Вялікай Айчыннай вайне, якіое падкрэсліла глыбокую павагу да ветэранаў і памяць аб тых, хто змагаўся за свабоду Радзімы.
Экспазіцыя фотавыставы ўключае 16 біяграфій, кожная з якіх раскрывае розныя аспекты ўдзелу работнікаў БрДТУ ў вайне. У цэнтры ўвагі — апавяданні пра лёсы канкрэтных людзей. Напрыклад, гісторыя Баляслава Іосіфавіча Камейша, які падчас Вялікай Айчыннай вайны быў актыўным удзельнікам партызанскага руху, змагаўся ў атрадзе «Бальшавік» Баранавіцкага злучэння. Пасля вайны займаўся партыйнай працай і выкладаў гісторыю. У 1972-1983 гадах узначальваў кафедру гісторыі КПСС у БрДТУ.
Гэтая і іншыя гісторыі дапамагаюць наведвальнікам лепш зразумець, якім чынам супрацоўнікі БрДТУ ўнеслі свой уклад у агульную перамогу.
Ініцыятыва стварэння праекта належыць дырэктару бібліятэкі БрДТУ Азаркевіч Юліі Вячаславаўне і супрацоўнікам, якія вырашылі аддаць даніну памяці сваім калегам, якія ўнеслі ўклад у перамогу над фашызмам.
У рэалізацыі праекта таксама ўдзельнічалі Самасевіч Валерый Аляксеевіч, аўтар выдання «Нам проста было не да адпачынку з табой...», які меў зносіны з ветэранамі і запісваў іх успаміны, і Чусаўлянкіна Святлана Аляксандраўна, якая працавала з архіўнымі матэрыяламі і займалася напаўненнем сайта.
Праца ў рамках праекта прадугледжвае стварэнне сайта, на якім дапоўнена раней выдадзенае даведачнае выданне «Нам проста было не да адпачынку з табой...» звесткамі з асабістых спраў і інфармацыяй з афіцыйных электронных рэсурсаў: абагульненага банка дадзеных «Мемарыял», банка дакументаў «Подзвіг народа ў Вялікай Айчыннай вайне 1941-1945 гг.», партала «Памяць народа», банка дадзеных «Кніга памяці» Рэспублікі Беларусь, праекта «Партызаны Беларусі».
«Асаблівасцю праекта з'явілася і тое, што мы нанеслі на Гугл карту месца нараджэння нашых ветэранаў і зараз можна адсачыць з якіх населеных пунктаў былога СССР яны да нас прыбылі, — распавяла Юлія Вячаславаўна. — Праўдзівыя ўспаміны ветэранаў, сабраныя ў матэрыялах сайта, спараджаюць сапраўдную сувязь пакаленняў, фарміруюць у новых пакаленняў усведамленне адказнасці за будучыню сваёй краіны».
У цырымоніі адкрыцця прынялі ўдзел кіраўніцтва ўніверсітэта, выкладчыкі і студэнты БрДТУ, а таксама асаблівы госць — малалетняя вязніца канцлагераў Інэса Мікалаеўна Кірылюк. Рэктар БрДТУ Сяргей Антонавіч Каспяровіч падкрэсліў важнасць захавання гістарычнай памяці і падзякаваў усім, хто прымаў удзел у арганізацыі выставы.
«Мы сапраўды разумеем, што памяць і тая гісторыя, якая ў нас ёсць, гэта вельмі важны рэсурс, вельмі важная аснова для таго, каб ісці далей, ісці наперад. Мы хацелі б, каб усе нашы студэнты, работнікі, госці, якія будуць прыходзіць у гэты час да нас, нашы ветэраны азнаёміліся і з выставай, і з тым, чым мы жывем сёння, таму што тое, што ёсць сёння, заснавана на тым, што рабілася раней, на тым подзвігу, які быў, які здзейснілі нашы дзяды, нашы бацькі, прадзеды», — сказаў Сяргей Антонавіч.
Інэса Мікалаеўна Кірылюк распавяла гасцям цырымоніі сваю няпростую гісторыю жыццёвага шляху. «Беражыце сваю радзіму, любіце сваю Айчыну, таму што вайна-гэта страшны час. Гэта разбураныя гарады, руіны, гэта спаленыя вёскі, гэта галеча, гэта голад, гэта холад. Такога дапусціць у наш час немагчыма!» , — наказвала моладзі Інэса Мікалаеўна.
Прысутныя ўшанавалі памяць пра ветэранаў БрДТУ і пра ўсіх, хто не дажыў да гэтага дня, хвілінай маўчання.
